صحبت منوروف

اوزبیکستان حقیده

نوروزبیره می

امیر تیمورگه هیکل اورنه تیلیشی قصه سی

|
|
۰۲
ثور
۱۳۹۵

اوزبیکستان اوز استقلالینی اعلان قیلگندن کیین، دولت نینگ برچه اورگانلرینی - حربی، سیاسی، اقصادی مؤسسه لردن تارتیب، اجتماعی، حقوقی و مدنی تشکیلاتلرگه چه همه سینی شونینگدییک مملکت نینگ ییر آستی، ییر اوستی بایلیکلری و فضاسینی اوزبیکستان خلقی نینگ دخلسیز ملکی دیب اعلان قیلدی و اوندن کیین اوزاق مدت دوام ایتگن آق و قیزیل مستملکه چیلیک دور لریده، تاپته لیب آیاق آستی قیلینگن ملی و معنوی قدریتلرنی تیکلشگه باشله دی و کمال جسارت بیلن تابو (TABOU- مقدس نرسه لر) گه ایلنگن مجسمه لرنی کوتریب، اورنیده اوزبیک خلقی نینگ ملی و معنوی افتخاری بولکن شخصیتلر هیکل لری اورنه تیلدی. مثلا مستقل لیک میدانیده کمونیستیک حاکمیت نینگ صلابتلی تمثالی بولگن «لینن» نینگ کتته و بلند مجسمه سی جاییده، بغریگه اوز باله سینی آلگن چیرایلی مهربان آنه هیکلی اورنه تیلدی. اندجان شهریده بابر خلق ارا فوندی رئیسی ذاکرجان مشربوف تشبثی بیلن ایکیته لینن برونز هیکلی ایریتلیب، اوندن ظهیر الدین محمد بابرنینک آت اوستیده تورگن هیکلی یسه لدی و اندجان شهری اورته سیده نصب ایتیلدی.

شو کبی اصلاحاتلر قتاریده تاشکینت شهری نینگ چارسو بازاری یقینیده جایلشگن روس شاعری «پوشکین» باغی، توتالیتر توزوم تمانیدن قتل ایتیلگن اوزبیک بویوک یازوچیسی و رمان ژنری نینگ اساسچیسی عبدالله قادری نامی بیلن «عبدالله قادری باغی» دیب اتلدی. اوشبو مناسبت بیلن باغ مرکزیده بیر ادبی مراسم بولیب اوتدی. اونده اوزبیکستان خلق یازوچی و شاعرلریدن تشقری اوزبیکستان پریزیدنتی دولت مصلحتچیسی خلق شاعری شکرالله هم قتنشگن ایدی. مین و ایریم دوستلریم هم یازووچیلر اویوشمه سی تکلیفی گه کوره مراسم گه اشتراک ایتگن ایدیک. پوشکین مجسمه سی اورنیده نصب ایتیلگن عبدالله قادری هیکلیدن پرده کوتریلیب، یازووچی حقیده صحبتلر بولیب اوتگندن کیین، یازووچیلر اویوشمه سی رئیسی جمال کمال شکرالله اکه گه یقینله شیب استه گینه اونگه دیدی: منه بو باغ نینگ عبدالله قادری نامی بیلن اته لیشی زور ایش بولدی. اگر یازووچیلر اویوشمه سی تمانیدن پریزیدنت جنابلریگه ایتسنگیز، سکویرده گی کارل مارکس هیکلی اورنیده صاحبقران نینگ هیچ بولمسه بیر کیچیککینه مجسمه سی قوییلسه قنچه یخشی بوله دی!

سویت دوریده امیر تیمور خلق دشمنی اورنیده قوییلیب، شونچه قره لنگن ایدی که هر جایده اونینگ حقیده ایجابی سوزایتیب بولمسدی. اکادمیسین ابراهیم مومنوف امیر تیموردن حمایه قیلیب یازگن اثری اوچون، نی کویلرگه توشگنی و آغیر تضییقات سببلی قلبی توختب حیاتدن کوز یومگنی هیچ کیمگه سرایمس ایدی.

شکرالله اکه بو تکلیفنی اسلام اکه گه ییتوشتیره من دیب سوز بیردی.

اوشنده حاضرگی چیرایلی «امیر تیمورخیابانی» (سکویر) یعنی کیچیک پارک دیب اتلردی. اورته سیده بیر کافی و باشقه بعضی بیر اتاقلر موجود بولیب، کتته درختلر بیلن اوره لگن ایدی. شرق تمانیده کوپ قبتلی اوزبیکستان هوتلی، غرب تمانیده تاشکینت دولت یوریدیک انستیتوتی، شمال طرفیده یازووچیلر اویوشمه سی و انرژی وزیرلیگی و جنوب تمانیده بیر قتار ترتیبسیز دکانلر و آشخانه لر جایلشگن ایدی. سکویر اورته سیده بیر کیچیک میدانچه اورته سیده بیر بتون پایه اوستیده جهان پرولیترلری رهبری کارل مارکس نینگ کیچیک (نیم تنه) مجسمه سی دقتنی اوزیگه تارتیب تورردی.

بیر آی اوتر اوتمس بیر کون قره سم هیکلدن اثر یوق، جاییده بیر قلین پرده ترتیلگن. بیر مدتدن کیین کورسم تیمورنینگ گچدن یسلگن هیکلی بیر تخت اوستیده اورنه تیلیبدی. بیر نیچه مدتدن کیین هیکل المشتیریلیب اوزبیکستان مشهور هیکلتراشی یسه گن صاحبقران نینگ بویوک و صلابتلی هیکلی کتته مراسم آرقه لی اوزبیکستان پریزیدنتی آرقه لی آچیلدی. حاضر اوشبو تاریخی حادثه دن 20 ییل اوته دی.

اسلام کریموف نینگ تشبث و ابتکاری بیلن تاشکینت شهری نینگ قاق مرکزیده اورنه تیلگن امیر تیمورنینگ آت اوستیده تورگن بو شکوهلی هیکلی، ملی- رمزی معناگه ایگه بولگن حالده اوزبیک خلقی نینگ حقیقی استقلال ایگه سی بولگنیدن دلالت بیریب، یاش و قرینی هیجانگه سالردی. قیزیل مرمر تخت نینگ بیرتمانیده تاش یوزیده یازیلگن «کوچ عدالتده دیر» دیگن صاحبقران نینگ اساسی شعاری، عدالت و انصاف هر بیردولت سیاستی نینگ اساسینی تشکیل ایتیشیگه توصیه ایته دی.

اوندن کیین هیکل نینگ اطرافی آرتیقچه درختلردن پاکیزه لنیب، کیچیک یولکلر و چیرایلی فواره لر بیلن بیزه تیلدی، شمال غربی تمانیده دبدبه لی و چیرایلی «تیموریلر دولت موزیمی»، جنوب شرقی تمانیده اوچ قبتلی فاروملر نهایت حشمتلی و زمانوی بناسی آچیلیب، جنوبی تمانی پایتخت مهمانخانه سی بیلن بیزه تیلدی. بو چیرایلی کتته پارک و اطرافی مترو بیکتی بیلن «امیر تیمور خیابانی» دیب اتلدی.

اوشنده مین بو تاریخی حادثه دن الهام لنیب قوییده گی شعرنی یازگن ایدیم. شعر «ملی تیکله نیش» گزیته سیده نشر بویب، قیزیقیش بیلن کوتیب آلینگن ایدی. شعر بیر تاریخی ملی حادثه نینگ محصولی بولگنی اوچون اونی هر ییل صاحبقرات تولدی کونی مناسبتی بیلن نشر قیله من.

 

شرعی جوزجانی

 

 

تيمير قلقان

 

کوزنی آچ صاحبقران، کوز کورمگن دوران نی کور

تيکله گن اوز قدينی آزاد ترکستان نی کور

 

چيقدی ايرکينليک قوياشی کويديريب ظلمت تونين

مستقل ليک بيزگه بيرگن بو بويوک امکان نی کور

 

مينگلب انسان بو وطن ده بولدی قربان ايل اوچون

حريت ديب، جاننی بيرگنلردن آققن قان نی کور

 

بيرگينه "فطرت" ايمس، کيچگن بو يولده جانيدن

"قادري"، "ناصر"، " منور قاري" و "چولپان" نی کور

 

يير يوزيگه سچره گن سانسيز شهيدلر قانيدن

قبرلر اوزره کوکرگن لالهٔ نعمان[1] نی کور

 

"معرفت سيزلر؟!" ديديلر بيزنی و "ياووز؟!" سيني

بو يامان تهمت گه باق، بو ناروا بهتان نی کور

 

 

قصه ايتور شوکتينگدن «يير يوزی نينگ صيقلي»[2]

تينگله بو حماسه نی، بو مثل سيز داستان نی کور

 

کوک که يول آچدی اولوغ بيک «کورگانی زيج» ايله

ييرگه بوی سونگن بو «زيج» ايله بويوک آسمان نی کور

 

«آق سراي» ايوانی باشدن تيکله نور، سين غم ييمه

يشنگن اولکنگ گه باق، اونده سرو سامان نی کور

 

سينديريب دشمن طلسمين باش کوتردی هيکلينگ

حقنی تيکلش يوليده بو حجت و برهان نی کور

 

اوزبيگينگ قويدی سينگه بو قهرمانليک هيکلين

افتخارينگ تيکله گن بو قهرمان اوغلان نی کور

 

موزه يينگ  کوک گنبذيدن بولدی بير يوکسک نشان

سين اوچون اونده قوريلگن قبه و ايوان نی کور

 

سين توغيلگن کون نشانلندی جهان مقياسيده

عالم اهليدن بويوک بو حرمت و اذعان[3] نی کور

 

بيرلشيب ايرکين يشش درسين بيرور«گور امير»[4]

تربتينگدن بيرليک انواری ياغر، لمعان[5] نی کور

 

خلقنی بيرلشتيرور دايم اولوغ نامينگ«تيمور»

اولکه نی اسرش يوليده بو تيمير قلقان نی کور

 

ايندی توران ملکيده خلقينگ بويوک دولت قورور

قول قوييلگن بو مقدس فکر اوچون پيمان نی کور

 

توزدی اوزبيکلر عدالتگه اساسلنگن توزوم

بيرق و طغراگه[6] باق، مدحيه[7] و فرمان نی کور

 

اوچمگی يورتينگده سين ياققن تمدن مشعلي

کوزنی آچ، نورگه چوميلگن مستقل توران نی کور

-------------------------------------------------

[1] قيزيل لاله

2  سمرقند شهري

3اعتراف

4 سمرقندده امير تيمور حشمتلی مقبره سي

5  لمعان - پارلش

6 دولت نشاني

7 ملی سرود


شو موضوعده




۱۳۹۱
ثور
۲۸





ستاکهولم، سویدن

info@baborshah.com