صحبت منوروف

اوزبیکستان حقیده

نوروزبیره می

حسـاس شـاعـر عـنـایـة الـلـه فـرهـمـنـد

|
|
۰۶
سنبله
۱۳۹۱

 

عنایة الله فرهمند

 


حسـاس  شـاعـر عـنـایـة الـلـه  فـرهـمـنـد


عنایة الله فرهمند، استعدادی قولاچ یازیب باره یاتگن یاش شاعر لریمیزدن. او، لطیف و یا قیملی حسیاتینی جانلی عباره لر، چیرایلی ترکیبلر و مضمون گه تینگ کیله دیگن گوزل سوزلر بیلن افاده لیدی.

فرهمند بیر متعهد شاعر. اونینگ شعرلری خلق دردی، اولکه مهری و اولوس نینگ پراکنده لیگی قیغولری بیلن یوغوریلگن. مقصد یولی هرقنچه آغیر و اوزاق کورینسه هم، او کیله جک که امید و ایشانچ بیلن باقه دی. اونینگ پهلوانی توگنمس کوچگه ایگه، اونینگ اوچون برچه حیات صحنه لری کورش و مبارزه میدانی.

شاعر ساکن دینگیزنی تیبره تیب، قارانغـو کیچه لرده موزلگن دشت و دله لرنی یاریتیب، اپّاق قارلرنی ییرگه چوکدیره دیگن صلابتلی بوران و کوچلی ایلدرم - چقماقنی کوته دی.

لیریک مضمونده گی شعرلری هم یاقیملی، صمیمی  و تکلف سیز اسلوبده یازیلگن.

بیز یاش شاعریمیز عنایة الله فرهمند گه ادبی ایجاد یولیده کتته یوتوقلر تیلب، اونینگ بیر قطار شعرلرینی "که پلک" دن اقتباس قیلیب، حرمتلی اوقوچیلریمیزگه تقدیم ایته میز.

 

 

"مقصدیم"

سینی کوزلب "مقصدیم"، بی خانمان بولدیم بوکون

بی کس و بیچاره، بی نام و نشان بولدیم بوکون

هر قره شدن طعنۀ تیرینگ باتر قلبیم گه، آه

تیز کیتیب، دومتیب یقیلگن کاروان بولدیم بوکون

قویمه گی راحت دمی کورگن عذاب و رنج لرینگ

کوچسیزلیک چولیده سرغیگن سمان بولدیم بوکون

قنچه لر اوتکن بو تقدیر سایه سیده قان یوتیب

کعبه یولیده شهید آرمان بولدیم بوکون


باتور شهيد

ملتيم،‌ اولكم دييب

آقدي قيزيل قانينگ شهيد.

شوكتيم،‌ شآنيم دييب

چيقدي عزيز جانينگ شهيد.

كيتمه گي تيكين گه اصلا

قان و جانينگ ذره هم

اوشبو يولداشلر بيلن

اولغيگي ارمانينگ شهيد.


قوياش

چقنه قوياش،

پارله قوياش،

بوتون عالم گه

ياغدو ساچ!

كتته - كيچيك گه

كوكسينگ آچ!

يولدوزلر بيز بيلن يولداش!

يولدوزلر بيز بيلن يولداش!


قچان؟؟؟

قچان؟

مین،

سین،

او،

بیز بولر میز؟

قچان؟

من- من،

سن- سن دن

قالرمیز؟

اوشنده کی،

حیات بولمسه !

مین و سین،

بولمه سک !


قاره تون

قاره تون

بغریگه چومگن

هوا،

هوس،

سیس،

نفس،

بوغزیگه بوغگن.

دینگیز

صلابتی

ساکنلیک توتکن.

قنی یارقین چقماق؟

قنی تیز شمال؟

آغیر هوانی

آقدیرسه

ساکن دینگیزنی

چاقدیرسه،

آپ آق قارنی

ییرگه

چوکدیرسه


مهربان

مهربان!

یادینگده می؟

کیپریگینگ قلبیم گه

تیر اورگن کونی

باقیشینگ روحیم گه

سحر سورگن کونی

مین بوتون دنیانی

سین دیب، کورگنده

هم خدا، هم قبله

سین دیب، یورگنده

بی خبر حالیم گه

کولدینگ بیر دمی

ققشه گن قلبیم نی

یولدینگ بیردمی

مین یتیردیم

هم سینی، هم سیوگینی

هم امید، هم آرزو،

هم تویغونی

ایسته می من سیوگی

سیندن مهربان

ققشه گن قلبیم نی

قیتر، بیر امان


کتاب

قلبی تولگن

بیر کتاب من

قولگه آلیب باقمه دینگ

چقنه گن اینجولریم نی

سین قولاققه

تاقمه دینگ

نقطه نقطه،

سوزمه سوز

چنگ فراقده

باتدی دل

صفحه صفحه

کوز آتیب

سوز دلیم نی چاقمه دینگ

طاقتیم تاق بولدی

کوزینگ گه ایلینمه ی

بیر دمی

نی اوقیب دردیم نی بیلدینگ

یا الو گه یاقمه دینگ


کوره ش

حیات کوره ش،

ممات کوره ش،

جان کوره ش،

سین کوره ش اوچون توغیلگن پالوانیم.

هوا کوره ش،

بقا کوره ش،

نان کوره ش،

سین کوره ش بیلن بوغیلگن پالوانیم.

بيل اوریب بیشکن، سین

دهقان باله سی!

ییلدیزینگ یَیره گن،

یغاچ یاله سی!

سین بیلیب چیققن کوره ش میدانیده،

سین کوره شگی سن، کوره ش دورانیده.

قیلمه گین پروای جان و آب و دان،

کوتمه گین کوچ باشقه لردن هیچ زمان.

سین یقیلمه دینگ،

یقیلمه ی سن بوکون.

سین ینگیلمه دینگ،

ینگیلمه ی سن بوکون.

سین فقط ایشان اوزینگ گه پالوانیم،

سین فقط ایشان کوچینگ گه پالوانیم.

سین بابر سن، سین تیمور سن پالوانیم!

سین یوتوق نسلی، باتور سن پالوانیم!

کوپریک

ایاغ آستیده بیز کؤپریک بؤله یلیک

محبت- سیوگیدن تاشیب تؤله یلیک

زماندن اجره لیب قالگن ملت نی

جهان قدریَت لریگه اوٌله یلیک

ملت نینگ قیغو، رنجینی پایله شیب

بیر نانیمیزنی ایککی گه بؤله یلیک

قچانگه چه مین و سین دیب، ایریلیب

بیزلیک گلشنیده مودرَب سؤله یلیک

کیل اونوت! میده- چویده نزاکت نی

بیزهم بیرله شیلیک، بیزهم کوله یلیک

ظالم فلک

مرمرین برماقلرینگده،

ایلنردیم، تاولنردیم.

ایچ، ایچیمدن

مین کویردیم، کویدیرردیم.

طاقتینگ تاق بولدی آخر

بیر چیکیم تنباکودیک تارتدینگ دَمینگگه باریچه

آتشیم سوندی، یوقالدی،

بیر توتم کول قولده قالدی.

قالدیغیم ینچیلدی،

إیزیلدی،

ایاغینگ آستیده.

بارلیگیم دود بولدی،

یه­یره لدی

وجودینگ اوستیده.

سین کولیمسه­ی سن،

کیف چوقیسیده

هر کونی مینگلب کیشی نی،

مین کبی

یاندیرر سن،

کویدیررسن،

دود قیلرسن،

کول قیلرسن،

لیک باقرسن، کولرسن

ای!

ظالم فلک.

بابر کلتوری انجمنی


شو موضوعده



۱۳۹۴
اسد
۳۰






ستاکهولم، سویدن

info@baborshah.com