صحبت منوروف

اوزبیکستان حقیده

نوروزبیره می

اوزبیک تنیقلی تصوفشناس عالمی، حیاتدن کوز یومدی

|
|
۲۰
سنبله
۱۳۹۱

 

پروفیسور  کا ملوف

ش. جوزجانی

نـجـم الـدیـن کـامـلـوف

اوزبیک تنیقلی تصوفشناس عالمی، حیاتدن کوز یومدی


اوزبیکستان تصوف شناسلیک علمی نینگ درغه لریدن بیری، ادبیاتشناس عالم پروفیسور نجم الین کاملوف شو ییل 26 اپریل کونی دنیادن اوتتی. اونینگ وفاتی تصوف شناسلیک علمی ساحه سیده کتته یوقاتیش بولدی.

ن. کاملوف 1937 ییل تاجکستان نینگ پنجی کینت تومنیده توغیلیب، وایه گه ییتدی. 1965 ییلی سمرقند فیلالوژی فاکولته سینی توگتدی. 1975 ییل فیلالوژی فنلری دوکتوری، 1991 ییل پروفیسورلیک عنوانینی آلدی. او، اونیویرستیتده کتته اوقیتوچی، تاشکینت دولت شرقشناسلیک انستیتوتیده کافدره مدیری، پریزیدنت دیوانیده مصلحتچی، اوزبیکستانده سیلاو (انتخابات) کمیسیونی رئیسی، "دولت و جمعیت قوریلیشی اکادمیسی" معاونی لوازملریده ایشلب کیلدی.

ن.کاملوف علمی فعالیتینی ترجمه و قیاسی ادبیاتشاسلکیدن باشلب، متن شناسلیک وادبی ژنرلر ترقیاتی بیلن باغلیق بولگن مسئله لرنی اورگندی. کیینگی ییللرده تصوف شناسلیک ساحه سیده تدقیقات ایشلری بیلن شغل لنیب، احمد یسوی،نجم الدین کبرا، ابن عربی، نسفی و بهاؤالدین نقشبند تعلیماتی بوییچه اثرلر یازدی.

مستقللیک دوریده او بیرینچیلردن بولیب علمی تصوف بوییچه کینگ کولملی تحقیقات ایشلرینی یولگه قویدی و سویت دولتی حاکملیگی دوریده یاریتیلیشی ممکن بولمگن مسئله لرنی تحلیل و انا لیز قیلیشگه کیردی. اوشه دورده تصوف تعلیماتی فیودال کلیریکل یعنی فیودال مذهب چیلیگی غایه لری صفتیده تنیلیب، انسانلرنی اینیقسه محنتکشلرنی یولدن آزدیریش مقصدیده خدمت قیله دی دیگن فکر اساسیده اونگه قرشی ایاوسیز کورش آلیب باریلردی. فقط پانته ایزم یعنی وحدة الوجود نظریه سی، اونینگ حقیقی مضمونیدن اجره تیلگن حالده، بیر "ماتریالستیک!" غایه صفتیده، تلقین قیلینردی و بیر سلبی وسیله صفتیده دین و مذهب گه قرشی ایشله تیلردی.

نجم الدین کاملوف بیرینچیلردن بولیب، تصوف تعلیماتینی اته ایستیک (الحادی) تلقینلردن اجره تیب، اورگه نیشگه حرکت قیلدی و تصوفده اساسی اورین توته دیگن وحدت نظریه سینی علمی اسلوبده یاریتیشگه اوریندی و بو ساحه ده علمی و عملی اهمیتگه ایگه بولگن بیرقطار اثرلر یازدی.

استاد کاملوف مینینگ یقین دوستیم ایدی، هر دایم علمی و عملی انجمنلرده اوچره شیب و تیلفون آرقه لی فکر المشیب تورردیک.  1995 ییل "تصوف تعلیماتی ایلدیزلری" ناملی یازگن رسالمنی اوقیب تنقید قیلگنی استادگه بیردیم. اثر حقیده فکری نهایت ایجابی و مثبت ایدی. اونی اوزبیکستانده تصوف شناسلیک بوییچه قوییلگن بیرینچی قدملردن حسابلب، تیزلیک بیلن نشر قیلیشیمنی ایسته دی و ممکن بولسه اونی بیر کتاب شکلیگه تولدیریشیمنی توصیه قیلدی. اثر اوشه ییلی "ملاقات" مجله سی نینگ 1-2، 3- 4، 5- 6  سانلریده باسیلیب چیقدی و کیینراق "تصوف و انسان" ناملی کتابیم نینگ اساسیگه ایلندی. اوشبو کتاب 2001  ییل "عدالت" نشریاتی تامانیدن 1000 تیراژده نشردن چیقریلدی. کتاب نینگ تکمیل بولیشیده مرحوم نجم الین کاملوف نینگ هم اورنی بار.

بیز هردایم علمی، ادبی ساحه لرده همکارلیک قیلیب تورردیک. استادنینگ "تصوف" ناملی کتابی بوییچه کتته بیر تقریظ یازدیم. بوتقریظ 1998ییل ملاقات نینگ 6 سانیده، شونینگدیک "سرلی عالم" ژورنالیده (2 سان، 1998 ییل)، "اشراق چراغی" عنوانی بیلن نشر بولدی. مین اوشبو تقریظنی "حاضرگی زمان اوزبیک تصوف شناسلیک علمیگه بیر نظر" عنوانی آستیده، مذکور کتابیم نینگ آخرگی قسمیگه کیریتدیم. اونی، استاد نینگ عرفانی و تصوفی قرشلری بیلن حرمتلی اوقوچیلر یمیزنی تنیشتیریش اوچون بو سایتده نشر قیله میز.

پروفیسور کاملوف نینگ نشر بولگن اثرلریدن ایریملری:

ـــ ابن سینا و دانته، تاشکینت، 1979،

ــ بو قدیمی صنعت، تاشکینت، 1987،

ــ نجم الدین کبرا، تاشکینت،1995،

ــ تصوف، بیرنچی کتاب، تاشکینت، 1996،

ــ تصوف، ایککینچی کتاب، تاشکینت، 1999،

ــ کامل انسان ــ ملت کیله جگی،تاشکینت، 2001،

ــ علیشیر نوایی غزللریگه شرحلر، علمی- تحقیقی مقاله لر.


شو موضوعده




۱۳۹۱
جوزا
۲۴





ستاکهولم، سویدن

info@baborshah.com