صحبت منوروف

اوزبیکستان حقیده

نوروزبیره می

علمی و ادبی محفل گزارشی نینگ دوامی

|
|
۰۸
حوت
۱۳۹۴

 

 

علمی  و ادبی محفل گزارشی -

 

نینگ دوامی 

 

ایکّینچی قسم

 

 

21 فبروری کونی غزل ملکی نینگ سلطانی حضرت علیشیر نوایی نینگ 575 ییللیگی و بویوک خاقان ظهیرالدین محمد بابرپادشاه نینگ 533 ییللیگی، بابر کلتوری انجمنی تمانیدن طنطنه لی و سیر مضمون علمی - ادبی محفل آرقه لی نشانلندی. محفلگه تنیقلی عالم و شاعرلردن استاد بسم الله میمنگی، استاد محمد حلیم یارقین، دوکتور شفبقه یارقین، استاد عبدالله تاشقین، محترم خیر محمد سولمس و فرشته ضیایی بیگم قتنشیب فعال حصه قوشگن ایدیلر. نوایی و بابر حیات و ایجادیگه بغیشلنگن علمی ادبی محفل یوقاری سویه ده بولیب اوتدی.    برچه اشتراکچیلر اونی کتته قیزیقیش بیلن کوتیب آلیب، ایستگن سوال لری بوییچه استادلردن قانیقرلی جوابلرآلدیل

ییغیلیش نینگ بیرکیچیک قسمی «سور پریز» شکلیده «بابر کلتوری انجمنی» باشلیغی و «بابرخلق ارا جماعت فوندی» نینگ ستاکهولم ده گی نماینده لیگی رئیسی دوکتورعلوم، پروفیسورعبدالحکیم شرعی جوزجانی نینگ  تولدیگه بغیشلنگن ایدی.

انجمن رهبریتی و کدرلری تماندن قبول قیلینگن بو تدبیر، کاظم نیازی آرقه لی اعلان قیلینیشی، استاد اوچون بیرکوتیلمگن حادثه بولدی. انانسر یوبیلیرنی انجمن رهبریتی و اعضالری تمانیدن تبریکلب، ترجمهٔ حالینی اوقیب ایشیتتیردی. اونده استاد باسیب اوتگن و کوپینچه آسان کیچمگن حیات باسقیچلری، علمی  ادبی فعالیتلری، اوزبیک خلقی، تیل و مدنیتیگه قیلگن خدمتلری و علمی اثرلری حقیده معلومات بیریلگن ایدی. بیز گزارشدن کیین اونینگ قیسقه چه متنینی قویه میز.

انجمن اشتراکچیلریدن ایریملری سوزگه چیقیب استادنی تبریکله دیلر. استاد محمد حلیم یارقین صحبت ضمنیده دیدی: استاد جوزجانی افغانستان پارلمانی نینگ 12 و 13 دوره لریگه اوزینی سرپل اهالیسی تمانیدن کاندید قیلیب، شهرده میتینگ و ییغیلیشلر اویوشتیردی، سیاسی بیانیه لر ایراد ایتیش بیلن سرپل یاشلری و اهالیسیده سیاسی آنگ و ملی شعورنی کوچیتیریش، خلقنی سیاسی کورش اوچون سفربر قیلیش تجربه لرینی اوتکزیش بوییچه کتته ایجابی رول اوینه دی، زمانوی علمی دنیاقرش بیلن بیز یاشلرنی آشنا قیلدی. اوزبیک تیلی و ادبیاتی رواجی یولیده سیاسی وعملی کورش آلیب باردی. افغانستان مطبوعاتیده بیرینچی بولیب اوزبیکچه شعرلر نشر قیلدی و بیرینچی بولیب آنه تیلده آق شعر ژنریده شعر یازدی و برماق وزنلریدن فایده لندی.

دوکتورشفیقه یارقین پروفیسورجوزجانی نی تولدی مناسبتی بیلن تبریکلب، سیاسی، علمی و ادبی فعالیت لری حقیده صحبت  قیلیب دیدی: استاد، علم و ادب اهلی بولگن بیرضیالی عایله ده توغیلیب وایه گه ییتدی. اونینگ آنه سی و اینیقسه کتته خاله سی اوزبیک و دری تیللریده صلاحیتلی بی بی آتون صفتیده کوپ اوزبیک قیزلرینی تربیه له دی. ایککنچی خاله سی قدیمی کتابلر اساسیده قصه پردازلیک بیلن عیاللر و یاشلرآره سیده تنیلگن ایدی. شعر و ادبیات بوییچه بیرینچی استادی اونینگ تاغه سی مرحوم استاد عظیمی سرپلی ایدی. او استادی وایکنچی تاغه سی منینگ آتم مرحوم محمد قاسم قاضی زاده  و برچه خانواده تشویقی بیلن، عالی سویه ده تحصیلنی دوام ایتدیریب، فن دوکتوری و پروفیسورلیک عنوانلرینی آلیشگه موفق بولدی و یوقاری اورینلرگه کوتریلدی.

استاد بسم الله خان میمنگی، افغانستان تورکلری مدنی فدراسیونی (ففتا) نامیدن تبریک سوزلریدن کیین، داملا جوزجانی حقیده قوییده گیدیک فکر بیلدیردی: مینینگ اکم مرحوم قاضی قربان نیاز مرید استاد نینگ صنفداشی و دوستی صفتیده مینگه ایتگن ایدی: بیزلر پغمانده گی شرعی علملر مدرسه سی (سونگره ابو حنیفه مدرسه سی) ده اوقیشیمیز جریانیده، محیطیمیزده شو فکر ترقلگن ایدی که مدرسه گه اوزبیکلردن اوچته نابغه ییگیت یعنی سید عبدالحکیم شرعی، قربان نیازمرید و عبدالستارسیرت تعلیم آلگنی کیلگن، لیکن اولرآره سیده سید عبدالحکیم یوقاری سویه ده توره دی.

مین کوپ ییللراوتیب شرعی صاحب بیلن تنیشگنیمدن کیین مرحوم اکم نینگ سوزلری توغری ایکنلیگیگه ایشاندیم. مین سیاسی، علمی و اجتماعی ساحه لرده استاد باسیب اوتگن مرکب مرحله لردن خبریم بار. حاضر انچه یاشگه ییتیب بارگن بولسه لرهم، اوز خلقیگه کمال صداقت و فداکارلیک بیلن قلم تیبره تیب تینیمسیز محنت  قیلیب کیلماقده. بیزافغانستانده بولیب اوتگن فاجعه لی باسقیچلردن کیین، استاد جوزجانی حیات  قالگنیدن خورسند میز. بیز شرعی جوزجانی اوز صفداشلری بیلن بیر تاریخی مرحله ده باشدن کیچیرگن تجربه لرینی، بیر امانت صفتیده، ینگی نسل اولادلریگه انتقال بیریشلرینی ایستیمیز.

مهمانلردن جنرال سراج الدین قیتمس استاد جوزجانی آلیب بارگن سیاسی و اجتماعی مبارزه لرگه قتنشیب، یوز بیرگن حادثه لرنینگ گواهی صفتیده معلومات بیریب سوزله دی: استاد سیاسی و انقلابی مفکوره لرنی بیرینچی بولیب سرپل و ایریم شمال ولایتلریده ترقتدی و یاشلرنی علمی دنیاقرش بیلن آشنا قیلیب، حزبی تشکیلاتلرگه جلب ایتدی. انتخابات دوره سیده سرپل لیکلر شو درجه گه چه بیرلشگن ایدی که، دولت مداخله لریگه قرشی، انتخابات جریانیده محبوس بولگنلرنی قماق خانه دن چیقریب آلیش گه چه باردیلر. اگر استادنینگ اوزاقنی کوریش تدبیری بولمسیدی، کتته بیر فاجعه یوز بیریشی ممکن ایدی. شونینگدیک شرعی جنابلری عدلیه وزیری و لوی سارنواللیک دوریده، «فرمان عفو و تخفیف مجازات» قانونینی تصویبدن اوتکزگندن کیین، عملا تطبیق ایتیلدی. اوشنده مین جلال آباد 11 فرقه سیده افسر صفتیده وظیفه اجرا قیلردیم. فرمان اساسیده آزاد قیلینگن 350دن کوپراق محبوسلر و عایله اعضالری دولتگه اوز راضیلیکلرینی اظهار ایتیش اوچون ولایت آلدیده ییغیلیشگن ایدی. اولردن ایریملری 20 – 30 ییل محبسده اوتکزگن ایکن.

استاد عبدالله تاشقین، خیر محمد سولمس هم تبریک سوزلرینی اظهار ایتدیلر. اولر و باشقه دوستلر کتابلر و چیرایلی تحفه لری بیلن استادنی قوتله دیلر. فرشته ضیایی بیر سیت چیرایلی قلم ساوغه قیلیب، شو نفیس قلم بیلن بیوگرافینگیزنی یازیب بیریشینگیزنی التماس قیله من، اونی اوزیم سوید تیلیگه اوگیره من دیدی.

استاد نینگ تولدی مناسبتی بیلن، «بابرکلتوری انجمنی» باشقرو هیئتی تمانیدن، بیر چیرایلی تحفه دن تشقری، انجمن رمزی بولمیش «قلم و دوات» بیلن بیزه تیلگن بیر رمزی کتته کیک تییارلنگن ایدی.

داملا جوزجانی تبریک مراسمی آخریده قوییده گیدیک ممنونیت بیلدیردی: عالملر و دوستلر ذره نوازلیک بیلن کمینه حقیده ایتگن صمیمی سوزلری و بیلدیرگن ایزگو ایستکلری توغریسیده کمال احترام ایله تعظیم قیله من  و اولرنی قدرلش اوچون امکانتیم باریچه، قلم قورالی بیلن فخرلی ملتیمیزحقوقینی تأمینلش یولیده کورش آلیب باریش اوچون سوز بیره من. شونینگدیک انجمنیمیز رهبریتی، کدرلری و برچه اعضالریگه اوشبو تدبیرنی یولگه قویگن لیکلری اوچون، چین کونگلدن تشکر و منتدارچیلیک اظهارایته من.

اوندن کیین انجمن سکرتری محمد کاظم نیازی محفلنی توگه تیب، اوزاق – یقیندن کیلگن دوستلرگه تشکر اظهار ایتیب، قدملریزگه حسنات دیدی.

راپورتر: ثریا سید

محفلگه تیگیشلی عکسلردن:

 

 

 

 

 


شو موضوعده









ستاکهولم، سویدن

info@baborshah.com