صحبت منوروف

اوزبیکستان حقیده

نوروزبیره می

یول بولسین تورنه لر!




    

یول بولسین تورنه لر! 


تانگ آتیب افقدن نور ترلماقده

تَرَلگن نور، ظلمت پرده لرینی

استه- سیکین ییرتیب ییغماقده.

تورنه لر توده سی بیرلشیب اوچیب

یول آلماقده اوزاق منزللر تامان

اولر کوپ باسه دی یول،

آشیب بلند تاغ و تاشلردن ،

چرچه مسدن قنات قاقیب اوچه دی

هرقنچه هم ایسسه ایزغیرین شمال

یوللرینی توسالمیدی اولرنینگ

انده سنده بیران آچ بورگوت

اَیریم صفدن چیققن تورنه نی

اولگوره دی آولب آلیشگه.

 

یول بولسین تورنه لر!

سیزگوزللیک رمزی سیز

کوپ چیگره لرنی آرتده قالدیریب

مینینگ اولکم گه هم اوتر بولسنگیز

بیلیب قویینگ

قوشلر اوچمیدی اونینگ آسمانیده،

سیزلراوچه دیگن ایرکین  فضانی

ایندی ایگللب آلگن

تیمیر قنات اوچاکلر

راکتلر و موشکلر.

 

اخیر بیلمیسیزمی سیز؟

بو اولکه ده

فرخنده لر، عایشه لر، مینگلب آته – آنه لر،

مینگلب جججی باله لرنی

تارتیب آلگن اولیم اوز گامیگه

اولرنینگ روحلری جیرقیرب یورر

و اولردن آققن قیزیل قان

دریا بولیب آقماقده.

 

بیله سیزمی تورنه لر؟

بیزنینگ اولکه میزده

دال – درختلر، گللر و اوسیملیکلر،

سوغاریله دی آدم قانی بیلن.

یورتیمیز آسمانیده قویاش،

ایندی خیره پارلیدی.

قبرستانگه ایلَنگن یورتده،

عزازیل و اولیم فرشته لری

حکم سوریب،

چارلشماقده بیر بیرینی هیقیریب.

 

ای بیرلشیب اوچگن گوزل تورنه لر!

زنهار،

باریب قونمنگ کوللرنینگ قیرغاغیگه،

ایچه کورمنگ ینه اوشه سولردن،

اخیر بیله سیزلرمی؟

آغولنگن بو کوللرنینگ سولری

بو سولرگه انسان قانی توکیلگن.

 

شرعی جوزجانی

۲۳.۰۱.۲۰۱۸

 

 

 

 

 




مطالب دیگر در این موضوع


۱۳۹۷
جوزا
۱۰
۱۳۹۷
جوزا
۰۱



ستاکهولم، سویدن

info@baborshah.com