صحبت منوروف

اوزبیکستان حقیده

نوروزبیره می

ایلک سیوگی

|
|
۰۱
جوزا
۱۳۹۷



ايــلــک ســـيـــوگـــي
ــــــــــــــــــــــــــــــــ

يادينگده می بير کون باغده
قوياش باتيب تورگن چاغده

ايککله ميز اوچره شگنده
مهر بيلن قره شگنده

بار ايدی قيزلر-عيال لر
بير نيچه باله لر، چال لر

مين سينگه قرب تيکيلديم
قاشينگه باقيب ايگيلديم

سين سوزلشدينگ اوزيم بيلن
کوزينگ ايسه کوزيم بيلن

گوزلرينگدن نور ساچيلدي
يوزلرينگده گل آچيلدي

آيگه اوخشب ترقتدينگ نور
بغيشلدينگ دلگه حضور

کوليب توردينگ ييرگه باقيب
يوره گيمگه اوتلر ياقيب

گوزل ليگينگ هيبتيدن
چيرايليگينگ صولتيدن

قالديم اوزيمنی يوقاتيب
لال بوليب قالدی تيل قاتيب

ذره کبی سيزديم اوزني
تيرمولوب توختتديم سوزني

ليکن سينينگ قاره کوزينگ
ايککی يارقراق يولدوزينگ

کورستدی مينگه التفات
روحيمگه باغله دی قنات

کوريب آغير احواليمني
نازلنيب سوردی حاليمني

ديدی مينگه ايما بيلن
کرشمه و ادا بيلن:

"ای سين گوزل ليک شيداسي
دايم سيوگی مبتلاسي

محبت اوتيده کويگن
کوب کوييب جانيدن تويگن

بيله سن، اوتدور محبت
باشدن آياق رنج و زحمت

برچه وجودينگ کويدرور
کولينی کوک گه ساورور

آلاو بيلن اوينی کورمه
بوکوی ني هيچ کويلی کورمه

يوقسه پشيمان بولورسن
بو يولده سرسان بولورسن"

ديديم: "ای فتنه لر کاني
ای گوزل ليک نينگ سلطاني

سين سن مينی زار ايلگن
اونگه گرفتار ايلگن

سين آوله دينگ بو يورک ني
سين تيترتدينگ بو کوکرکني

کونگليم گه اوتکزيب تأثير
روحيمنی ايلدينگ تسخير

ايندی سيندن ايريلگيم يوق
آرقه تامان قيريلگيم يوق"

ـــ ای مين سيوگن نازنين يار
ای سينگه بو جانيم نثار

کونگليم نی آلگن ای طناز
باشدن آياق برچه سی ناز

سين قوياش مين بير ذره من
اطرافينگده ايلنه من

سين قيزيل آلتين، مين توپراق
سين گوزل ليک مين اشتياق

عشق اوتيده کويدير ميني
ايلديريم بول سوندير ميني

عشقينگ شعله، مين بير خس من
برچه سی آرزو، هوس من

سِرلشر مين بيلن کوزينگ
يوق- يوق کوزينگ ايمس اوزينگ

اونگه قرب سوز توقيیمن
قلبينگده گی نی اوقيمن

کونگلينگ سرين آچر بولسم
حقيقت نی ساچر بولسم

يورکده ارمانلرينگ بار
ياشيرين فغانلرينگ بار

سيويليب کيلگن سن جانديک
مغرور تورگن سن آسمانديک

کورگنلر حسن و جمالينگ
بيلگن لر يوکسک کمالينگ

عاشق شيدا بولگنلر
ارمانلر بيلن يورگن لر

ليکن سين سيوالمگن سن
هيچ کونگل بيرالمگن سن

دلده سيوگی ترانه سي
يورک ارمانلر خانه سي

سوزده دايم جان و قربان
دايم کونگل ايچره ارمان

اما دوداغينگ سوسيدي
سيوگی ميينی ايستيدي

روحينگ چين سيوگيگه مشتاق
قلبينگ ده ساغينچ-اشتياق

تيلينگ بونی انکار ايتر
ليکن کوزينگ اظهار ايتر

سيوه آلالمسليک دردي
تيلگه آلالمسليک دردي

عزيز روحينگنی ايزه دي
يوره گينگ بونی سيزه دي

بير موهوم سيوگی نينگ اوتي
نا معلوم سيوگی نينگ اوتي

کويديره دی سينی دايم
اوزينگه ديسن: "الايم،

کيليب بير کون نصيب بولسه
چيندن قلبيم "اوني" سيوسه

بوتون کونگليم اونگه بيريب
محبت ميوه سين تيريب

سيويش بختيگه ايريشسم
وصال تختيگه ايريشسم"

ليکن بيلميسن او کيمدور
قه ييرده دور، قچان کيلور

بو حقده خيال توقيیسن
خرگايی قيليب اوقيیسن

"اونی سيوالمسم نيتي"
"اونی سيوالمسم نيتي"

جانگينم مينگه تيکيب کوز
ايندی ايشيت بير-ايککی سوز

ديمی من "اوني" کوتمگين
ليکن "اوني" اونوتمگين

قوی "او" سين بيلن يشه سين
قلبينگده سيوگی توشه سين

موهوم سيما بوليب قالسين
سرلی رويا بوليب قالسين

ليکن بونی هم بيله سن
سيومسنگ هم سيويلگن سن

مين کبی بيقرارينگ بار
يولينگده انتظارينگ بار

سيوگی يورتی نينگ گداسي
قيغو وغم مبتلاسي

سينی ديب بينوا بولگن
محبت ديب ادا بولگن

او سيندن ايرو چيدالمس
هيچکيم اونينگچه سيوالمس

سين اوچون جاندن اوته دي
برچه جهاندن اوته دي

هيج قچان اونی اونوتمه
سيوگيسينی آسان توتمه
ـــــــــــــــــــــــــ
شرعی جوزجانی

ـ




مطالب دیگر در این موضوع


۱۳۹۷
جوزا
۱۰



ستاکهولم، سویدن

info@baborshah.com